الأربعاء، 8 أغسطس، 2012

الخيبه تقيله جدا

نظرية المؤامره مريحه جدا للعقل الفاشل
 كلهم خانوك يا ريتشارد، كلكوا عليا ولا ايه؟!! عبوكو كلكو

وسائل الدفاع النفسيه كتير العنب الحصرم والليمون الحلو، الاسقاط وأحلام اليقظه. حاجات بتريح الواحد وتخليه مايفكرش في خيبته التقيله.
بس نظريه المؤامره لها مفعول ساحر، لإن الخطأ مش منك لا كمان ده علشان انت جهبذ ومافيش منك فالكون بيتآمر عليك وعلى نجاحك.
مؤخرا فاجعه إستشهاد ١٦ جندي وضابط مصري في رفح في عمليه إرهابيه منذ أيام، فورا بدأنا في تأسيس قواعد المؤامره الكبرى التي حيكت لنا بليل لتصيبنا بهذه المصيبه.
إسرائيل هي من وراء الحادث لأنها أعلنت قبل الحادث بيومين عن إحتمال وقوع عمليه إرهابيه في سيناء، متأمر واهبل يعني تعمل المؤامره ضدنا وتحذر منها!!! طيب حذرت منها احنا ماعملناش حسابنا ليه
ملاحظه عابره: في نكسة ٦٧ تم الهجوم الجوي على مصر يوم ٥ يونيو وبعدها الأردن وبعدها سوريا وكان النجاح عالي فيهم كلهم، ماحدش اتعلم أو عمل حسابه.
لالالا دي حماس اللي ورا الموضوع ده طاب ليه إذا كان المعبر حيتفتح والحكومه الإخوانيه المصريه حتدعم الحكومه الإخوانيه الفلسطينيه. قالك لا علشان تسيء للقوات المسلحه المصريه وتحرجها أمام الاخوان ليستطيعوا السيطره عليها؟؟!!!!
عمالين ندور على مؤامره ومتآمرين علينا، اصل إحنا كنا عاملين كل إحتياطتنا وإستجابتنا كانت سريعه بس المؤامره كانت مُحكَمه. والدليل إن كان فيه إعلان إسرائيلي عن عمليه وشيكه و جنودنا-رحمة الله عليهم- تجمعوا للإفطار سويا
الدليل التاني إن بعد اقتحام المدرعه الحدود قوات الإحتلال استهدفتها بصاروخ ودمرتها وعملت طلعات جويه إستكشافيه على الحدود للتأكد من عدم وجود متسللين آخرين، وبعدها اجتمع مجلس الوزراء الإسرائيلي وبعد ما خلصوا إجتماعهم، تم الإعلان عن دعوه لإجتماع الرئيس مع القائد العام للقوات المسلحه. شوف سرعة رد الفعل!!!
كمان الاسعاف وقوات الامن اللي وصلت موقع الحادث أخدت أكثر من ساعه!!

كفايه كفايه كفايه
كل شويه دم يهدر بسبب اللادوله الفاشله وكمان بنستعمله كوسيله للدفاع عن اللادوله الفاشله وتكريس نظريه المؤامره في عقولنا.
رحمة الله على شهدائنا

الأحد، 19 فبراير، 2012

أمثال تودي في داهيه

"إن كان لك عند الكلب حاجه قوله يا سيدي" تقديم تنازلات من أجل الحصول على الحقوق وتستبدل بكلمه ظريفه كالبرجماتيه.
"يا نحله لاتقرصيني ولا عايزه منك عسل" حل عني وإرحل تستبدل بكلمه عجيبه تسمى خروج آمن.
"أربط الحمار مكان مايحب صاحبه" وقد تم تطويره إلى "أربط الحمار مكان ماهو عايز" يا عم كبر مخك تستبدل بإرضاء العميل الزبون يعني.
"ماقدرش على الحمار يتشطر عالبردعه" الرئيس كويس بس اللي حواليه هما اللي وحشين يتم استبدالها الحرب بالإنابه، وإذا قيل هذا المثل من زياد العليمي فيعتبر جريمه يعاقب عليها القانون ومجلس الشعب.
"القرد في عين امه غزال" عنصري المثل ده والمفروض يعاقب عليه القانون لانه بيزدري القرود.

في النهايه اقول المثل ده "قالوا حيسخطوك يا قرد، قال غزال يعني!!" مبنتهددش لإنكم ماخليتوش حيليتنا اللي نخاف عليه.
يسقط يسقط حكم العسكر

السبت، 18 فبراير، 2012

قُل إسقاط السُلْطه ولا تقُل تسليم السُلْطه

لا يجوز أن نتحدث عن تسليم السلطه لأنه ببساطه يشبه كلمة الخروج الآمن، كلاهما يعني أن المجلس العسكري فاشل وفاسد فقط وليس خائن وقاتل.
المجلس لن يسلم السلطه ولكن سيرتدي قفاز جديد وهو يمارس سياساته المنحطه لإدارة البلد. سيستعمل غطاء سياسي مقبول تحت مسمى رئيس منتخب شرعيا. بكل بساطه لأن انتخاب سلطه تنفيذيه حقيقيه بمجرد سيطرتها على مصادر القوه بالسلطه -القوات المسلحه والداخليه- سيكون لديها القدره على محاسبته.
كل يوم تزداد أخطائه الكارثيه كل يوم يسقط الكثير من الأبرياء كل يوم يزداد رعبا من لحظة الحساب.
لا أعلم ان كان المجلس لايزال يبحث عن رئيس طرطور يناسبه ام انه وجد ضالته وسط المرشحين الحاليين، لكنه ان شاء الله سيخسر الرهان سواء عبر الصناديق او خارجها في حالة تلاعبه بالنتائج.
نهاية المجلس العسكري وكل من قتل قريبه جدا لا أعرف كيف ستكون ولكني متأكد انها ستكون أكثر من سيئه.

لم استطع استكمال البوست :(

الجمعة، 13 يناير، 2012

الدوله بين الهيبه والسقوط

كل ما تتزنق كلكعها. اخبط الناس بقين مكعبرين يرعبوهم.
إوعى الفراغ الدستوري جاى. حنروح فين ونيجي منين من غير رئيس. البلد حتقف وحيجيلنا إستبحس حاد، يا عم بيقولك فرااااغ ذستوري.

تنحى تخلى كلَّف الرئيس سميها زي ما أنت عايز والدنيا ماشيه ولا فيه حاجه اتغيرت ـ بالسلب او الإيجاب للأسف ـ 
دلوقتي كل ماحد يتكلم عن سوء تعامل الداخليه والقوات الجيش مع المتظاهرين. يقولك هيبة الدوله يجب استعادتها.
يعني ايه هيبه ويعني ايه دوله؟؟
هيبه من يهاب يعني يخاف، والدوله كيان من افراد اقليم محدد بيدير المكان طبقا لمصالحهم المشتركه ويدير الخلافات ما بينهم بشكل سلمي عادي.
طيب يركبوا ازاي مع بعض!! أخاف من الكيان اللي بانتمي ليه!
طيب الدول المعاديه ليا المفروض تعمل ايه تحب دولتي؟ تصادقها او ترافقها ـ لاموأخذه ـ
مشكلة البلد كانت من فقدان الاحساس بالإنتماء لوطنهم نتيجة الظلم والذل اللي كانوا بيعيشوه فيه، كان اللي بيحفظ الأمن مش العدل ولا إحترام القانون بل كان القهر و الخوف من مطبقي القانون.
يعني بدل مايقولوا كلمه عِدله زي إعادة روح الإنتماء للوطن، يقولك هيبة الدوله. عالم خايبه صحيح.

سقوط الدوله!!! إلحق دول عايزين يسقطوا الدوله...
حنعيش فين بعد ما يسقطوا الدوله يا ابوحميد، دي مصيبه العيال دي اتجننت.
هو الناس مش كانت بتهتف "الشعب يريد اسقاط النظام" ؟؟ 
هو ايه النظام؟؟ نظام ادارة الدوله ولا نظام الترميز بتاع الريسيفر؟
الدوله مش المفروض انها بتنظم مصالح مواطنيها وبترعاهم؟ طيب شوف كده مثلا التعليم
الطلبه بيتعلموا اما في مدارس خاصه او اجنبيه (للقادرين) او في مراكز الدروس الخصوصيه (للعامه).
العلاج لغير القادرين مثلا، المستشفيات الاهليه قايمه بدور كبير جدا، واللي بتديرها الحكومه معتمده على التبرعات.
الرعايه الاجتماعيه للايتام مثلا والاسر شديده الفقر معتمده بشكل كبير على التنظيمات الاهليه.
الدوله تخلت عن دورها في رعاية ابناء البلد فقط لمصلحة اصحاب ابن الرئيس المخلوع. من الآخر بقت دولة ابوه.
يعني ما يسمى سقوط الدوله لا يعني المواطن الفقير لوجود دوله أخرى ترعاه.
ناس حتقول سقوط الدوله يعني حرب اهليه. كلام شكله حلو بس بين مين ومين؟ طوائف ايه؟ اهل البحيره حيطلعوا على اهل اسكندريه مثلا!!!!
فيه خلافات طائفيه ماحدش ينكرها بس اللي مانع تحولها لحرب مش وجود النظام الحالي( السابق سابقاً) اللي مانع الحرب اننا مجتمع مسالم رغم حالة العنصريه والاحتقان اللي وصل ليها.
والاهم ماحدش عايز يسقط الدوله بشكل كامل زي ماهم بيصوروا. اسقاط الطبقه الحاكمه ليس اسقاط للدوله.
الافراد يموتوا وتبقى الدول، وإلا لزالت دولة الإسلام بوفاة الرسول ـ عليه الصلاة والسلام -.
فكها كده تلاقيها سهله والله الموفق والمستعان. :))