الجمعة، 16 ديسمبر، 2011

الراعي والذئب +١٨

واحنا أطفال كانوا بيحكولنا على حكاية الراعي اللي كان بيكدب ويصرخ يقول إلحقوني الذئب هجم علي وأكل الخرفان بتاعتي. وكل مره الناس تيجيلوا ويكتشفوا انه بيكدب. المره اللي هاجموا الذئب بجد صرخ ماحدش عبره. 
وده جزاء اللي يكدب باستمرار.

الروايه الحقيقيه مش اللي سمعناها واحنا صغيرين. دي الروايه الحقيقيه.
كان في البلد واحد بيسرق خرفان البلد ويبيعها في بلد جنبهم. المهم ان الناس قدروا يطردوه من البلد.
الراعي بطل الروايه كان ابن الراجل ده. المهم انه قالهم حارعالكم الغنم بتاعكم وحيكون معايا في أمان.
بعد كام يوم رجعلهم يصرخ الحقوني يا ناس الذئب هاجمني و اكل خروف وماقدرتش امنعه ده حتى خربش ايدي. كانت ايده مجروحه فعلا.
والحكايه اتكررت كل كام يوم يصرخ ويقول نفس الحكايه. الناس اتعودت مابقتش بتستغرب الكلام ولا حتى تفكر تشوف اتجرح ازاي. كان كفايه لفة شاش على ايده كدليل واضح لكفاحه ضد الذئب الآثم.
لغاية ما خرفان البلد خلصت. قالهم يا أهل البلد انتم كنتم اهل لي بس انا مش لاقي شغل دلوقتي فمضطر اسيب البلد وأسافر أدور على شغل.
أهل البلد مسكوا فيه وقالوله انت اكتر واحد ضحى علشانا ولازم نكافئك ونعينك عمده للبلد.
اتعين عمده واشتغل تاجر خرفان كبير وعنده مزرعة كبيره فيها خرفان بالضبط شبه اللي كانت عندهم.

يعني الحقيقه ان اللي بيكدب كتير مش بيخسر لا الناس في الآخر بتصدقه وبتكافئه وبتحبه كمان.

للأسف دي الحقيقه.

الأربعاء، 7 ديسمبر، 2011

إحنا حنرجع قله مندسه ولا إيه؟

المجلس العسكري متورط في عدة جرائم قتل للمتظاهرين بإعتباره طبعا المسئول عن ادارة شئون البلاد.
أوقات كان الشرفاء من أبناء الوطن بيعتدوا على المتظاهرين- القله المندسه المخربه- تحت حماية قوات الجيش. مثلا العباسيه.
أوقات كانت الشرطه العسكريه -سيف المعز- بيدهسوا المتظاهرين او عفوا الاصابع الخارجيه المندسه سرقت مدرعه ودهست المتظاهرين كما هو بالروايه الرسميه!!!! مثلا ماسبيرو.
اوقات كان بيتم استخدام نفس الوسيله المستنفذه اللي هي الشرطه لان سمعتها بالسوء اللي ممكن تخليها تتحمل أي مجزره تحصل. زي معارك محمد محمود.
طبعا في جميع الحالات كان الاعلام الرسمي قذر كالعاده ويقوم بتشويه صورة المتظاهرين والتحريض عليهم. بيتكلم دايما عن الاصابع الخارجيه الساعيه للوقيعه بين المجلس والشعب. وان المتظاهرين السلميين الأبرار اندس وسطهم عناصر مخربه.
بس المجلس لعبها المره دي صح. وضيع الحاله الثوريه اللي كانت بتزيد. بعمل الانتخابات في موعدها و التغيير الوزاري الكسيح.
القوى السياسيه التي لم تبدأ الثوره وحاولت ركوبها إهتمت بالانتخابات اكثر من الضغط للحصول على حكومه انقاذ وطني.
الشعب لسه ماحسش بأي نتايج للثوره ولسه بيدور في الساقيه علشان يآكل ويأكل عيلته. توسم في التغيير الوزاري الخير لانه بقى بيتعلق في قشايه.
ورجعنا قريبين من الوضع القديم. قله مندسه

فيه أمل لسه. أنا شايف ان الامل كبير ان شاء الله، وحتكمل الثوره يا مسكري

الجمعة، 11 نوفمبر، 2011

مستخدم محدود الصلاحيات

أوقات تدي أمر لجهاز الكمبيوتر تلاقيه يرفض ويطلعلك رساله سخيفه بتقولك "روح إلعب بعيد ياض" اسم المستخدم بتاعك محدود الصلاحيات. شوف حد كبير عنده الصلاحيه انه يعمل اللي انت عايزه.

بالرغم انه جهازك وانت اللي شغال عليه يقولك لا مش كل اللي انت عايزه تقدر تعمله. إنت فاكر نفسك مين؟ !!! فووووق

صدمه إنك تفتكر نفسك المسيطر، لتفاجأ أن أدواتك نفسها تفرض عليك الوصايا.أدواتي أنا!!! آه أدواتك انت.

تكتشف انك مانتاش ياما هنا وياما هناك. انت مجرد مستخدم عادي مسموح لك بحاجات بس مش كل حاجه.
المستخدم السوبر او الأدمن بيكون ليه كل الصلاحيات بيكون فعلا مسيطر لدرجة انه لو عمل حاجه مدمره للنظام، النظام نفسه مش حيوقفه وحينهار.

علشان كده الشخص السلبي والعقلاني بيكون قريبين من بعض السلبي لانه بيستسلم للقيود اللي بتتفرض عليه. والعقلاني دايما بيحط لنفسه القيود لانه بيفكر بشكل خالي من المخاطر.
علشان تبقى مستخدم سوبر لازم تكون متمكن من أدواتك وعندك القدره على تحمل المخاطر أو نتايج اختياراتك.

فيه اللي بيعيش حياته وفيه اللي بيقضيها. فيه اللي بيستمتع بحياته وفيه اللي مايعرفش يعني ايه يستمتع.

الثلاثاء، 8 نوفمبر، 2011

خوف قرف كراهيه

مابخافش من الفيران، انا بس باقرف منهم!!!
انا مابكرهش فلان بس هو مقرف فعلا!!!
هو ليه بنحاول نتجنب التعبير عن حقيقة خوفنا بتحقير مصدر الخوف.
وليه بنحقر اللي بنكرهه، هو حد ضربنا على ايدنا علشان نحبه؟
ولا فعلا صعب تمييزهم؟

الأحد، 23 أكتوبر، 2011

كله على الأطراف

ايون فاهم قصدك بس كلامك-الفاضي من وجهة نظري- مش صحيح، اسمع كلامي.

تنظير و تقعير و تحطيب.
إسلامي متطرف، علماني متطرف، اشتراكي متطرف وأناركي متطرف. البلد كلها بقت طروف و ماحدش قاعد في النص.
عملنا زي الافيه بتاع عادل امام "سايبين الشقه كلها وقاعدين في اوضه واحده!!".
سايبين كل ما يمكن الاتفاق عليه و ماسكين في الخلافات. بس مش ده اللي خنقني.

فعلا اتخنقت من المبالغه بالفرح أو الحزن والندب على اي تطور بيحصل حوالينا. ثوار ليبيا قتلوا القذافي من غير محاكمه-انا كشادي اتبسط الصراحه- عبد الجليل اعلن بعض القرارات اللي متوافقه مع الشريعه. الاسلاميين هيصوا و العلمانيين بيندبوا. التوانسه ماشيين في طريق الدستور اولا، انصار الدستور اولا- انا منهم- يقولوا جاتنا نيله في حظنا الهباب.
بقينا القرعه اللي بتتباها بشعر بنت اختها.
هل ده نتيجة التحول من الكبت للحريه بشكل فجائي. ولا تحويل الصراع السياسي من رأسي لأفقي بنجاح حتى تستمر المؤسسه العسكريه لتسعه و خمسين عاما آخرين؟
أحاول البقاء متفائل. إن شاء الله خير

الجمعة، 21 أكتوبر، 2011

هو احنا ليه مابننزلش التحرير

بعد اعلان تنحي مبارك و تنازله عن الحكم للمجلس العسكري. هدأت الجماهير و بعد يومين تركنا ميدان التحرير. واصبح السلام الوطني لمصر " لو ماعملوش حاجه ميدان التحرير موجود و مش حيطير".

مع مرور الاحداث متباطئه ثبت عدم صحة هذه المقوله "التحرير بيطير"
التغيير بيتم بشكل طفيف جدا و بطيء جداً. ومع ذلك فإن الإقبال على التظاهر أصبح ضئيلا.
كل اعتصام يتم فضه بالقوه ولا تصعيد في المقابل. وكل انتكاسه في مسيرة الثوره لا تُحدث رد الفعل المناسب.
تحولت الثوره من فعل إلى رد فعل أقل من ما يحدث.
اكثر من ١٢الف مسجون بمحاكمات عسكريه. لم يتم محاكمة كبار المسئولين. لازال الدهس مستمر و التعذيب كما هو. و لا يوجد رد فعل مناسب.

لكن ايه هي الاسباب؟
ممكن ان التظاهر فقد تأثيره ومبقاش مسيلة الضغط المناسبه؟
ممكن اننا بدأنا نتعود على الوضع الحالي زي ما كنا متعودين على بلاوي المخلوع- اللي هي نفسها لسه موجوده-.
ممكن بسبب اقتراب الإنتخابات و بدأ إستعداد الفصائل السياسيه المختلفه للإنتخاب مع اني مش شايف تحركات ليهم.

احنا دفعنا ثمن عربيه مرسيدس و اخدنا عجله من غير سرعات كمان. المشكله اننا متوقعينها تتطور لعربيه!!!

الخميس، 13 أكتوبر، 2011

ماسبيرو ٩ اكتوبر

إنا لله و إنا إليه راجعون.

درع الوطن يعمل على الوقيعه بين أفراد الشعب. 

بس بشوف الجانب الإيجابي إن الصدامات العنيفه دي ممكن تكون تفريغ حالة الإستقطاب اللي إحنا فيها.

خالص عزائي لأهالي الضحايا. وربنا يرحمنا جميعا.

الأربعاء، 12 أكتوبر، 2011

أزهى عصور العنصريه

حضاره ٧٠٠٠ سنه. أذكى طفل في العالم هو الطفل المصري. أمهر عماله في العالم هي المصريه.
الوحده الوطنيه و النسيج الواحد اللي مافيهوش فتله ...فتله مش مظبوطه.

كلام كتيير بنقوله لنفخ الذات. آه حضارة ٧٠٠٠ سنه لكن بحكم فرعوني ماطورناش فيه وسيلة حكم مدني أو شعبي.
كمان كنا شعب متدين لكن متأثر بالخرافه اكثر بكثير.
الباقي طبعا خرافات و أساطير المتأخرين.
نيجي للوحده الوطنيه. آه فيه كتير بيتعامل بمنطق المواطنه لكن فيه عدد مش قليل بيفكر في كل حاجه بشكل عنصري بحت.
"الله يرحمك يا سادات كنت مربيهم" "هما عايزين ايه اكتر من كده؟ دول أخدوا اكتر من حقهم." كام مره سمعت الكلام ده؟
السادات ـانا عن نفسي مابحبوش ـ اصبحت كل انجازاته في الحياه انه نصر الاسلام بإيه؟ إنه اضطهد المسيحين، لا حرر القدس ولا نصر المسلمين في فلسطين. بس اضطهد المسيحين!!!!
المسيحيين عايزين ايه اكتر من كده؟ عايزين يصلوا في كنايسهم عادي زي ما انت المفروض تصلي في الجامع. شايف ان ده كتير؟
و بيتجمعوا في الكنايس كده ليه؟ سيادتك لان عدد الكنايس اقل من العدد اللي محتاجينه فبيتكدسوا مش غاويين زحمه.

نشوف كمان "الاحتلال العربي " "المسيحيين هم اساس البلد".
ايوه في ناس شايفه المسلمين مُحتليين للبلد ومالهومش حق فيها. بس لو كده مش يبقى الكفار أولى هما كانوا في مصر قبل دخول العائله المقدسه لمصر. و قبل دخول اليهود لمصر من الأساس.
و بعدين المسلمين دول ماجوش في يوم و ليله. بعد دخول المسلمين مصر فضلت المسيحيه دين الاغلبيه لفتره ليست بالقليله مع تحول المصريين للاسلام و اختلاطهم بالمسلمين القادمين من الجزيره العربيه اتغير الوضع. لانه لو ماكانش ده اللي حصل كان المسيحيين ليحملوا ملامح افريقيه خالصه و المسلمين ملامح آسيويه خالصه.

حاجه كمان. عفريت التنصير و الكلام عن محاولات التنصير لشباب مسلمين. رأيي في الموضوع ده في ٣ نقط
  1. دعوة صاحب دين غير دينك معناه انه عايزلك الخير لانه ببساطه شايف ان ما تتبعه ليس بدين منزل من السماء و الا لكان اتبعه.
  2. استمالة الشباب بالمال. هو اللي حيغير دينه لإغراء مالي عنده دين من الأساس؟ ده يبقى واخده سبوبه "انا على دين اللي يقبضني اكتر"
  3. استمالة الشباب بالبنات. يعني برضه واحد يغير دينه لشهوه جنسيه. بالرغم ان ده من الاساس حيحرمه من امكانيه التطليق !!
و نفس الكلام طبعا بالنسبه للعكس.

ليه بنشوف عملية تغيير الدين كأنها مباراه؟ واحد أسلم، واحد إتنصر. ليه مانشوفهاش انى انا مقتنع بديني و شايف الآخر جانبه الصواب في معتنقه و اني ادعوه بس لمصلحته هو مش علشان انصر ديني بواحد زياده؟ لإن ديني هو الصح حتى لو كان معتنقيه أقليه.

خلاصة كلامي ان فيه عنصريه و فيه تمييز ديني. بس من السهل علاج الموضوع و تخطيه بوضع قوانين و ضوابط لبناء دور العباده و تحويل الدين. و بعد قليل من الوقت حيقل عدد المتعصبين و حيقل تأثيرهم بشكل كبير جدا.
"أُنصر أخاك ظالماً أو مظلوما. قيل: و كيف أنصره مظلوماً؟ قال: أن ترده عن ظلمه." معنى الحديث و ليس النص بالضبط.
دعوة المظلوم ليس بينها و بين الله حجاب. اتقوا دعاء المظلوم

الجمعة، 30 سبتمبر، 2011

مين ده اللي حمى الثوره

١-المجلس بيفخر انه كان ناوي يعمل انقلاب في حالة التوريث. ليه؟
لانها كانت حتتحول لدوله مدنيه.(تعديل: سيصبح الرئيس شخص غير عسكري لاول مره منذ ٥٩ عام)
٢-المجلس لما نزل القوات للبلد كان لحماية المواقع الهامه من السقوط في يد الثوار و محاولة السيطره على الثوره.
٣-في حالة ما كان المجلس اصدر اوامر بالضرب كان الجيش سينقلب على المجلس او على الاقل سيحدث انشقاق بصفوف الجيش بين منحاز للشعب و منحاز للقياده.
٤-بفرض استجابة جميع افراد الجيش لاوامر المجلس بالضرب لكانت كثافة السكان بمصر و طبيعة التحام المدن لتمثل عائق كبير يواجههم و ترجح كفة خسارة المعركه -لم ينتصر جيش نظامي امام حرب شعبيه حتى ولو كانت حرب اباده-.

الخلاصه موقف المجلس لم يحمي الثوره لانها كانت لتنتصر في النهايه نعم الخسائر ستكون اكبر لكنها ستنتصر. موقفه حمى الجيش من الانشقاق و حمى المجلس من انقلاب الجيش عليه.
المجلس لم يدفع اي ثمن للثوره بالتالي لا يحق له ركوب الثوره او يدعي بطوله.

الاثنين، 26 سبتمبر، 2011

لماذا ٣٠ سبتمبر

انا نازل يوم ٣٠ سبتمبر.
ماعتقدش ان الاسباب مش محتاجه توضيح.

الثوره قامت بمطالب و مادام رأس النظام سقط يفترض ان تنفذ هذه المطالب بشكل فوري.
اللي حصل غير كده. بكل بساطه تم تنفيذ مخططات المخلوع لإجهاض الثوره اثناء ايامها الأولي بحذافيرها.
آداء المجلس العسكري الذي تولى الحكم مكان المخلوع مطابق تماما لآداء المخلوع بل بشكل أسوأ.
جاري استعمال كل اساليب تصفية الروح الثوريه من البلد على عدة محاور:
  • التشكيك في وطنية من يتم تصويرهم كقيادات للثوره كأنهم صنعوا الثوره من العدم.
  • التشكيك في ان الثوره اساسا عمل مصري و تصويرها كمؤامره دبرتها و نفذتها ايدي خارجيه و كأننا شعب لامؤاخذه يعني.
  • الحفاظ على حالة عدم الاستقرار حتى يفقد الشعب ايمانه بجدوى الثوره.
  • الاستمرار في اساليب القمع لتقليل قاعدة المعارضين.
المحاكم العسكريه اسوأ مما قبل. تمديد العمل بقانون الطوارئ بناء على قرار المخلوع و مجلسه المزور كأنما لم تحدث ثوره تسقط المخلوع و تحل مجلسه المزور.
انفراد المجلس بالقرارات الاساسيه دون الرجوع لاحد. استفتاء الشعب علي ٦ مواد و عمل اعلان دستوري من اكثر من ٦٠ ماده لم يتم الاستفتاء عليها. و مخالفته لمبادئ الاعلان بالمحاكمات العسكريه.
عودة الرقابه على الصحف و التليفزيون بشكل غبي -يعني رقابه و غباوه كتير كده-.
الوضع الحالي هو مجلس كان متأهب للقيام بإنقلاب في حالة حدوث توريث للحكم فوجئ بثورة الشعب ضد الرئيس الأب فأضطر لإزاحته للحفاظ على البلد تحت سيطرته دون عناء الانقلاب بمخاطره. لكنه وجد نفسه تحت ضغط شديد لاستكمال مسيرة الثوره والتي بالضروره ستضره لانها تهدم النظام السابق والذي يعد جزء رئيس منه.

من الآخر المجلس وصِل و وصلنا لمنطقة ثوره او لا شئ. و انا اخترت الثوره.
السلام عليكم. و تحيه للشعب المصري الحر

الأحد، 25 سبتمبر، 2011

شهادة المشير


شهادة طنطاوي كاملة ، شير ، توضيح: الشهادة اتنشرت, بنحاول نعيد نشرها من أكبر عدد 
ممكن عشان ماحدش يتاخد بسبب كسر حظر النشر,

طبقا للرابط ده
http://www.25jan-news.com/article.php?id=4799
اول من خرق حظر النشر كان التليفزيون المصري و تعمد الكذب

لو مهتم تشيل معانا جزء من المسؤولية اعد نشر الشهادة باسمك, او اكتفي بقرائتها :)

...جاري تحديث الشهادة 

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج1 : الاجتماع كان برئاسة رئيس الوزراء واعتقد أننه بلغ


س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟


ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد
الرئيس ؟


س3: ما الذي أبداه رئيس الجمهورية في هذه اللقاءات ؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة ، القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث


س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين بما فيها استخدام الاسلحة الخرطوش والنارية من 25 يناير حتي 28 يناير ؟

ج4 : ليس لدي معلومات عن هذا واعتقد ان هذا لم يحدث


س5: هل ترك رئيس الجمهورية السابق للمتهمين المذكورين من أساليب لمواجهة الموقف ؟

ج5 : ليس لدي معلومات


س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران


س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج7 : ليس لدي معلومات


س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج8: إنا معنديش معلومات بكده.. الاحتمالات كتير لكن مفيش معلومة عندي


س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

ج9 : إنا معرفش ايه اللي حصل


س10 : هل تستطيع سيادتك تحديد هل كانت هناك عناصر أخري تدخلت ؟

ج10 : هيا معلومات غير مؤكدة بس اعتقد ان هناك عناصر تدخلت


س11 : وما هي تلك العناصر ؟

ج11 : ممكن تكون عناصر خارجة عن القانون


س12 : هل ورد لمعلومات سيادتك ان هناك عناصر اجنبية قد تدخلت ؟

ج12 : ليس لدي معلومات مؤكدة ولكن ده احتمال موجود


س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه


س14 : ولمن يصدر رئيس الجمهورية علي وجه العموم هذه الأوامر ؟

ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك


س15 : وهل يجب قطعا علي من تلقي أمر تنفيذه مهما كانت العواقب ؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع المتظاهرين الصادر منه شخصيا

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟

ج17: يسأل في ذلك مساعديه الذين ابلغوه هل هو علي علم أم لا

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟

ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟

ج19 : هذه مسئولية جهات التحقيق

س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه ولكن التظاهر وفضه هي خطة وتدريب موجود في وزارة الداخلية

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك ؟ ج 21 : معنديش علم بذلك

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس -يتبع

ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س24 : هل هناك اصابات أو وفيات لضباط الجيش ؟ ج 24 : نعم هناك شهداء

س25 : هل تعاون وزير الداخلية مع القوات المسلحة لتأمين المظاهرات ؟ ج 25 : لأ

س26 : هل أبلغت بفقد ذخائر خاصة بالقوات المسلحة؟ 

ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟ 

ج28: لا ..لم يتم القاء القبض على أى أحد

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟

ج29 : لم يحدث


س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟

ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب


الأحد، 11 سبتمبر، 2011

مش فاهم

شوية اسئله مش لاقيلها إجابه و شويه عارف اجابتهم و بستهبل

هل كان هناك حاجه فعليه للسماح للمتظاهرين بدخول السفاره لتبرير ما بيتوا النيه لعمله؟

ألازال قانون الطوارئ ذا جدوى في ارهاب المعارضين بعد ٣٠ سنه؟
ألازال قانون الطوارئ او تفعيله له تأثير مخيف بعد محاكمة ١٢الف مواطن محاكمه عسكريه و حبسهم؟
هل قانون الطوارئ فعال ضد الحركات الثوريه؟

عودة الرقابه على الإعلام بشكل صريح. هل لها فائده في ثوره تمت الدعوه لها عن طريق الانترنت و تم محاربتها بالاعلام التقليدي؟
الثوره لم تكتمل. لكن من يعيقوا مسيرتها الم يروا كيف سارت و تطورت؟ ام كانوا خارج البلاد مثلي وقتها؟
هل الأسوأ لم يأتي بعد؟
هل ينقلب السحر على الساحر؟
و السؤال الأهم لماذا اصبحت الاصابع اكثر اعضاء الجسم استعمالا و ذكرا؟

الثلاثاء، 30 أغسطس، 2011

نشر الغسيل القذر و دفن النفايات الأقذر

أخبار وقائع فساد يتم نشرها.
بعضها يتم نشر اخبار عن تحويلها للنائب العام و التحقيق فيها. و الباقي!!!!!
طيب الصناديق و الكراتين والبراميل والذي منه والكلام الكبير عن ميزانية قناة السويس راح فين؟؟

أول ما محمود وجدي ساب وزارة الداخليه هوووب كل مواقع أمن الدوله هات يا فرم وهات يا حرق في الملفات.
دلوقتي دخلنا في موجه تانيه. بلطجية مصر يتم القبض عليهم و هوووب ينتحروا!!!!
ينتحروا؟ ايوه زي ما انت سامع. دول طول عمرهم عايشين الهم و نص عمرهم قضوه في السجن. يعني ما فيش حاجه جديده عليهم. طيب صحوة ضمير أو نزعه تدين؟؟ ماكنوش انتحروا كانوا تابوا.
طيب ليه حبيب العادلي ماينتحرش مع انه كان عايش فرعون و زال سلطانه و عاش الذل (حنفترض ان كل ده بيحصل و انه مش في سجن ٥ نجوم إف إم ) ؟؟
واضح اننا بنمر بالمرحله التانيه من دفن النفايات الأشد قذاره. و مش بعيد اكون فولت على الأخ حبيب و نلاقيه منتحر لو قضيته دخلت في الجد.

بس الواضح انهم بينشروا الغسيل الوسخ فوق -بص العصفوره- و يدفنوا الاوسخ تحت الأرض.

السبت، 27 أغسطس، 2011

الكيمياء المصريه

عرفت ليه الناس بتقول على الحاجه المكلكعه "هي كيمياء".
مش لاقي حاجه اكتبها، واللي بلاقيه محتاج اكتب القاعده الاصليه و التشبيه. حاجه تفقع.
ده اللي لقيته ينفع. تتعوض المره الجايه

الحزب القوي يطرد الحزب الضعيف من مقاعده في البرلمان.

الرابطه التساهميه: الرابطه بين افراد الشعب قائمه على التحام فعلي بين افراده لا تقوم على تبادل منفعه لكن على وحدة المنفعه.

الرابطه الايونيه: رابطه بين حكام الشعب و الشعب نفسه من المفترض ان يعطي الحاكم للشعب ليظل مرتبط بيه لكن العكس هو اللي بيحصل و هو اللي بياخد من الشعب فالشعب بيمسك فيه علشان ياخد حقه منه.

الحزب القوي هو الذي يستطيع افراده الانتشار بين افراد الشعب و الحزب الضعيف هو الذي يظل اعضائه مرتبطين بمقاره ولا يكون لهم اختلاط بجماهير الشعب.



الجمعة، 5 أغسطس، 2011

الفيزياء المصريه

 الغباء لا يفنى و لا يستحدث من العدم، لكنه ينتقل من فرد مسئول لآخرين.

الغباء يتناسب طرديا مع القوه، و عكسيا مع عدد المتظاهرين.

الارض دائريه(كنت فاكرها كرويه) و محيط قطرها ٨٥ مليون مره محيط ميدان التحرير.

الكهرباء هي فيض من الالكترونات تسري من عصا خاصه في اتجاه جسم المتظاهرين.
النظريه السابقه كانت بتقول انها من القطب السالب للموجب و التيار الافتراضي من الموجب للسالب بس كل ده طلع غلط.

التصادم المرن هو اصطدام عصا او شومه برأس المتظاهر حيث لا يحدث فقد لدماء. و يعتبر من صور فض الاعتصامات السلميه.

التصادم غير المرن هو اصطدام سنجه أو حجر كبير برأس متظاهر و يحدث فقد لدماء. و برضه يعتبر من صور فض الاعتصام السلميه.

العمليه ثابتة الحراره "Isothermal process" هو عمل كردون يحيط بالمتظاهرين و الشرفاء من ابناء الوطن للحفاظ على حرارة التفاعل بينهم و رفعها ببعض قنابل الغاز في حالة انخفاضها.

الحركه البراونيه هي الحركه العشوائيه التي يتم بها تعيين ترقيه او عزل اي مسئول حكومي كبير.

قوى فان دير فالس هي القوه الالكتروستاتيكيه الضعيفه التي تربط بين افراد النخبه السياسيه.
تختلف طبعا عن الروابط التساهميه التي تربط باقي افراد الشعب.


الحصه الجايه كيمياء :)

Vodafone Shokran

السبت، 23 يوليو، 2011

لا حافظ ولا فاهم

طرح الاصلاحات اللي قدمها مبارك و اترفضت بس الناس قالت ماشي الحال
عمل استفتاء و عمل عكس نتيجته.
استعمل المحاكمات العسكريه للمدنين و نفس الضرب و التعذيب.
استعمال البلطجيه لفض الاعتصامات.
عمل وزاره بلا صلاحيات حقيقيه.
اتهم الحركات الوطنيه بالعماله والتعالي على الشعب بادعاء ان شرعيته منه فيه
التساهل الشديد مع النظام السابق(اذا اعتبرناه فعلا سابق)
و الآن الاشتباكات العنيفه مع المظاهرات و استخدام البلطجيه تماما كالداخليه يو ٢٨ يناير.
ناقص ايه تاني؟
هي الناس دي عندهم فقدان ذاكره للدرجه دي؟ ده ما فاتش ٦ شهور

الاثنين، 11 يوليو، 2011

الى المجلس العسكري.....الشريحه اتحرقت ورميناها

لا ده مش نفذ رصيدكم. الشريحه اتحرقت خلاص

انتوا ايه مبارك كان مخليكم لانكم مالكومش في السياسه زي كده ما السادات اختاره نائب.
عايزين تعملوا زيه؟ بس سنكم كبر والناس مش زي زمان.
شرف لبسكم في الحيط و طلع قالها واضحه انا مش بإيدي حاجه

شريحة شرف خلاص اتحرقت و فقدتم القدره على الاتصال بالشعب خلاص.

هو حل من اتنين
يا تعينوا الوزاره اللي ينتخبها الشعب من الميدان ممكن تتعمل انتخابات عاديه برضه خلال اسبوع
يا تشكلوا مجلس رئاسي من الكتاكيت المرشحين للرئاسه و تسلموهم السلطه بجد


مش حينفع اقول على تليفونات حرقتوا الشريحه. دخلتم البن كود غلط ٣ مرات

نتسلى لغاية ما يطلعوا بالبيان المش*** ربنا يستر

عايزين تغيير 

ماشي نجيبلكم مين يعني عصام طاب آدي عصام تمام كده. فله عليك




ايه تاني ماهي الداخليه بترجع للعمل و دعمناهم بكام ألف عسكري امن مركزي!!!!!
و كام ميت عربيه علشان الدوريات (عربية الآتاري باللهجه الشعبيه)



محاكمات طيب ماهي ماشيه اهي و احنا عايزين ثوره استثنائيه ثوره محصلتش قبل كده بدون محاكمات استثنائيه.


لا للمحاكمات العسكريه للمدنين.
زي الفل الحمد لله راضيناكم و مالكمش مطالب اهه ماشيين زي الفل

لا للمحاكمات العسكريه للمدنين

يا جماعه قلنا المحاكمات بتاعة الفلول ماشيه حلاوه و كله بالقانون.

لا لمحاكمات العسكريه للمدنين
احمدوا ربنا اننا ماعملناش زي ليبيا ولا سوريا

مش حاسيين بالتغيير و نازليين تاني التحرير

شفيق هاتلوهم البمبوني

وقال الراوي مسسسسم قال ثوره قال

الأربعاء، 29 يونيو، 2011

حافظ مش فاهم

كنت قبل كده حالم جدا و قلت ان ممكن تدوير ضباط و عساكر الشرطه.
كنت باحلم ان ممكن بالتبديل في مواقعهم ممكن الحال يتصلح.
لكن واضح ان غباءهم مرض عُضال لا يمكن علاجه. الشرطه سقطت يوم ٢٨ يناير لان قدرتها على البطش فشلت.
ردع الشرطه طول عمره ماكنش لانها جهة تنفيذ القانون لكن لانها قادره على البطش.

الشرطه دلوقتي مالهاش سند غير القانون. الكارثه بالنسبه لهم انهم مش فاهمين ده، و هي ميزه لينا اننا اتأكدنا انهم غير قابلين للإصلاح.
HOPELESS CASE
ذكاءهم الفطري و ممكن يكون بكتيري او فيروسي صورلهم ان الردع حيرجعلهم بالقمع بتاع زمان - كان نفعكم يوم ٢٨ يناير يا ......-
رجعوا يوم ٢٨ يونيو  لنفس الاسلوب الفاشل الفاشي. انتوا مبتفهموش؟ طيب في حاجه اسمها التعلم بالمحاوله و الخطأ أو حتى الاستدلال الشَرطي- مش الشُرّطي- يعني اما بتضرب الناس بتسخن اكتر و تضربك.

او ممكن يكون الجنون انكم مستنيين نتيجه مختلفه لنفس الفعل.

اللي انا اتأكدت منه انكم لسه مش مصدقين اللي حصل يوم ٢٨ يناير.
لأ حصل حصل بجد ايوه اللي حصل ده حقيقه مش كابوس و هو ده الوضع الحالي Love It Or Leave It
يا ريت تفهموا ده

جاتكم البلا

عناصر مندسه تحاول الوقيعه بين الشعب و الشرطه.
بلطجيه و فلول المحليات تثير اعمال شغب و تقوم بتكسيير المحلات و السيارات بالقرب من وزارة الداخليه.
أوامر من وزير الداخليه بسحب القوات من ميدان التحرير. (القوات تتقهقر)
القبض على عدد من مثيري الشغب و المتسببين في احداث مسرح البالون.

اي حد و اي حاجه ايد واحده

حبيبة الكل طبعا عجلة طرواده

إضافه بتاريخ ١١ ديسمبر
الاصابع الخارجيه والطرف الثالث

الأحد، 26 يونيو، 2011

ركوب الموجه

الموجه بتتكون من حركة مية البحر ناحية الشط نتيجة سرعة الرياح والكلام ده. بتكون الميه زي طبقات واحده فوق بتتأثر بالهوا اكتر فبتتحرك اسرع، و واحده تحت بتلمس القاع فبتكون ابطء. بينهم طبقات بتتحرك بسرعات متوسطه. لما الموجه بتقرب من الشط الطبقات المتوسطه بتقل فبيكون الفرق مابين الطبقه العليا و القاع كبير كسرعه و قليل كمسافه فالموجه بتقلب و تجيب عاليها واطيها.

التيار البطئ اللي بيكون قريب من القاع بيكون اقل واحد متأثر بالرياح لكنه هو اللي بيقوم بكنس الزباله اللي في البحر اكياس شيبسي و اكياس بلاستيك ماحنا عارفين ايه اللي بنهببه في المصيف.
اما بيقرب من الشط و الموجه بتقلب الزباله بتطلع فوق مش علشان هي حاجه كويسه او تستحق انها تكون فوق بس علشان البحر يرميهالنا على الشط تاني -خدوا زبالتكم يا بقر وسختوا الدنيا- لكن الموجه لو كانت ضعيفه و مكملتش بيكون كل اللي حصل ان الزباله اللي طلعت من القاع تفضل عايمه على السطح و خلاص. الزباله مبتطلعش من نفسها و مبتركبش الموجه، الموجه اللي مبتكملش هي اللي بتطلع الزباله لفوق.
هو كده.

الثلاثاء، 21 يونيو، 2011

بااااس هو ظابط جيش يمسك الداخليه

كلام كتير عن التسيّب اللي البلد فيه من بعد الثوره؛ الشرطه لسه مارجعتش بكفائتها. الإستقرار يا ناس إلحقونا عجلة الانتاج حتفسي.

سيادك هو ما كانش فيه تسّيب قبل الثوره؟ مش كان المسجليين الجنائيين بيتاسبوا علشان يشتغلوا مرشدين للمباحث؟
المرور كنت بتخلص حاجه من غير رشوه؟ المرور تاني مش كان بيسيبوا سواقين الميكروبص يعملوا اللي عايزنه؟
المرور تالت مش كانوا اما يحصل تصادم بسيط مبيتدخلوش و يسيبوا الناس تتصافى لوحدها بالدراع؟

التسيّب موجود طول عمره بس احنا اتعودنا عليه و مكناش بنسمع عنه ﻹن الإعلام كان مشغول في أزهى عصور الديموقراطيه و النمو الإقتصادي الفزييع اللي مصر كانت بتحققه.

طيب عاجبكم حال البلد؟ العيسوي خرع و مش قادر عليهم بااااااس هو ظابط جيش يمسك الوزاره يظبطها.
سيادتك هو ظابط الجيش حيعمل ايه؟ حيوقف الظباط طابور ذنب "اقف ياظابط منك له و ارفع ايدك"؟
مش فاهم يعني هي قوة الوزير هي اللي حتصلح الوزاره ولا خطة العمل اللي حنعدل على أساسها؟
هو اللي بيضرب بالمسدس محتاج تكون عضلاته قويه ولا محتاج تكون ايده ثابته و بيعرف ينشن صح؟

الحل مش في وزير من الجيش. الحل في عمل خطة عمل لتعديل الداخليه-تعديل مش تطوير- خطه الظابط اللي حيلتزم بيها على راسنا من فوق اللي مش حيلتزم ألف سلامه.
طبعا التخلص من الوجوه العكره المتورطه في التعذيب و مصايب فساد اسود من وشهم لازم يتحاكموا.
اللي كانوا ماشيين زي ما الناس ماشيه هما اللي الكلام عليهم "ينفع معاك نظام الشغل كده اهلا وسهلا مينفعش قدم استقالتك".
وخريجيين الجامعه كتير تدريبات شرّطيه محترمه في مصر و بعثات تدريبيه في الخارج و يبقى عندنا كوادر زي الفل تدير الداخليه.
تاني حاجه هو العادلي ماكنش شديد مع الظباط؟ كانت ايه النتيجه جهاز يجيد القمع فقط.

يا ساده القانون هو القوة اللي تقدر تمشي البلد صح مش قوة الداخليه.
الشرطه قوتها من الالتزام بالقانون مش بقوة الوزير.
قبل ما نتكلم عن دستور الأول لازم نتكلم عن ميثاق شرف شرطي جديد يتحط على اساسه خطة تعديل الشرطه
ﻹن لا إستفتاء و لا انتخابات ممكن تتم بشك صحيح في غياب اﻷمن.
والسلام عليكم

الاثنين، 13 يونيو، 2011

طاب و الحل؟

قامت الثوره خلعنا الرئيس. أصبح لنا اول رئيس مخلوع والحمد لله بعد ان كنا نتمنا رئيس سابق بس ربنا كريم.
مبادئ الثوره كانت كرامه حريه عداله اجتماعيه.
لا تزال الثوره لم تحقق اهدافها، نجاحات معجزه حدثت لكن لم تتحقق المبادئ نعلم انها ستأخذ بعض الوقت و لكن....
مؤسسة الإعلام لا تزال على فسادها تمارس التضليل و تعارض الثوره و الإصلاح بصوره اقل حده طبعا. و لكنها تعبث في عقولنا و تعزف على وتري الاستقرار و العجله.
الإعلام من أثار الناس على المعتصمين في التحريرأثناء الثوره يثير الناس ثانيةً ضد الثوره بدعوى تهاوي الاقتصاد و انعدام الامن.
الكرامه استعادها الشعب لكن لم يصل للحكام حتى الآن أن الشعب استعادها و يتعاملوا بنفس الطريقه السابقه.
العداله الإجتماعيه لم نسير في اتجاهها بفضل الموازنه الجديده التي لم تختلف عن موازنات يوسف افندي في الكثير من انحياز لرأس المال.
الحل إيه اتخنقت؟
ممكن الضغط من اجل اصلاح الاعلام.
العمل على إصلاح ما افسده الاعلام 
فالاقتصاد ان اهتز فذلك لأنه كان يحكمه مجموعه صغيره كلها تقريبا متورطه في الفساد.
ثانيا الاداء الاقتصادي لم ينهار تباطأ قليلا لكنه لا يزال ينمو و هذا ينسف اي دعاوي بإفلاس قريب.
ثالثا أمن العقل ان ايقاف عمليات النهب المٌنظَم للإقتصاد يؤذي الإقتصاد؟
و انعدام الامن هو التطور الطبيعي لتغييب القانون فكانت سلطة القمع هي المسيطره على البلد و بسقوط القمع سقط الضابط للبلد.
عودة الأمن معتمده على احترام الداخلية للقانون مما سيكسبها احترام الشعب لها و عودة الامن اعتمادا على سيادة القانون و ليست على القمع كما كانت في السابق و هو ما ثبت انه كان امن هش.

العداله الاجتماعيه لن تتحقق الا باقرار الحد الاقصى للاجور في الموازنه و رفع الحد الادني عن الرقم الهزيل الضبابي الذي تم الاعلان عنه. يجب مراجعة الموازنه بشكل سريع و اجراء التعديلات الضروريه.
ربنا يستر

تجريم الاعتصامات......من أنتم؟

ما لم يجرمه مجلس شعب منتخب هو مُزوَر بس اسمه كده مجلس الشعب، كيف تجرّمه حكومة انتقاليه؟
الحكومه جت من الميدان بس واضح انه المحور كان مقفول فكان ده السبب بس.

يا حكومة الثوره لولا اضراب العمال لظل مبارك راسخ على قلبنا مده اطول-عقبال الراسخ التاني اما يغور-.
يا حكومة الميدان العمال انضموا للثوره لانها بتطالب بحقوقهم المشروعه اللي اتحرموا منها كتير.

يا حكومة تسيير الأعمال من أنتم لتسنوا قوانين في هذا الوقت انتم فقط تسيروا امور الدوله لحين إنتخاب مجلس شعب و رئيس للجمهوريه.
من جاء بكم كان عبر اعتصام فكيف تجرموه الآن؟

عامل مطحون بيقبض اللي بالكاد يكفيه اكل وممكن شرب. و طبعا الاحصائيات اللي بتبين ان المصريين معظم انفاقهم على الاكل دليل واضح على صحة الكلام ده
بأي منطق أو ضمير يتم معاقبة من ينفذ اعتصام أو إضراب بالحبس و غرامه ١٠٠٠٠ جنيه.

بعد موازنه اسوأ مما يكون لم تحقق أي شئ من توقعاتنا بحد اقصى او ما شابه يأتي إقرار هذا القانون؟
لم تعطوا شئ للعمال و تحرموهوم من التعبير عن استيائهم. من أنتم و كيف تعقلون؟

الخميس، 9 يونيو، 2011

المصري غريب حي و ميت

المجد للشهداء المجد للشهداء المجد للشهداء
الثوره قامت من أجل الكرامه. كرامة المصري كإنسان وليس ككائن حي يأكل و يشرب و يتناسل.
قبل الثوره كانت كرامته مهانه في أقسام الشرطه في وسائل المواصلات في إسلوب حياه لا إنساني يفقده إحساسه بإنسانيته ليكون كل همه الحصول على قوته ليتحول لكائن حي.
الناس اتحرقوا في قطر الصعيد غرقوا في العباره ماتوا في السجون من التعذيب. و لم ينالوا حقهم كإنسان فارق الحياه، بل تم التعامل معهم كعدد من السكان اختفى من الوجود.
ليه لأ و هم لم يعيشوا كبشر ليموتوا كبشر.
بعد الثوره يتم دفن ١٩ شهيد مجهول الهويه بدون أي إعلان من حكومة الثوره عنهم، كأنهم لقطاء.
حتى لو لقطاء أليسوا بشر؟ هؤلاءمن ماتوا من أجل أن تأتي هذه الحكومه لتحافظ على كرامة الإنسان المصري.
لمتى سيظل المصري غريب في بلده حي و ميتاً.
إنها لسقطه كبيره لحكومة الثوره إن كانت غير متعمده.
و إشاره واضحه لأن الحكومه تسعى بجهد لإفقاد المصري ما استرده من انسانيته وهو كرامته.
المجد للشهداء و العار لمن يضيع دماءهم.

الثلاثاء، 7 يونيو، 2011

الشرطه ...........و الشعب ليه رب اسمه الكريم

اي مجتمع بشري بيتفق على مجموعة قواعد تنظم حياته و التصرف في حالة وجود تعارض مصالح سموها القانون.
بيحكم على اساس هذه القوانين القاضي.
بينفذ تعليمات القاضي طبقا للقانون الشرطه.
يعني دور الشرطه التأكد من تطبيق القانون و عدم اختراقه. في مصر من اكتر من 10 سنين الحكومه علشان تقلل من الاعتراض عليها خصوصا من الغير مهتمين بالسياسه بانها تكبّر مخها شويه-على رأي المخلوع- يعني ياداخل بين الماطن و اخوه ما ينوبك غير ريحتهم.
في المرور عربيه تخبط عربيه مفيش مشكله يتفاهموا واللي يتفقوا عليه كويس و اهو الاتنين مبسوطين. واحد اتخانق خلاص يتصرفوا مع بعضهم احنا حنوجع دماغنا بالناس البيئه دي.
و الناس حست بده و ابتدت تتجنب الشرطه هي كمان لان معروف الشرطه بتنفخ اللي يجي تحت ايدها.
ظابط امين شرطه مش فارقه كله باشا و اللي عايزه يمشي المهم تكون الداخليه راضيه عنا
ملاحظه هامه:ايام عبد الناصر كان قرار الاعتقال بيوقعه رئيس الجمهوريه اما المخلوع كان بيفوض صلاحيته-دولة مؤسسات وكده-للوزير اللي كان بيوزع على المديريات قرارات اعتقال على بياض و عيش.
الشرطه كان عندها سلطات مطلقه و لا كانت هي ولا الناس بيتعاملوا بالقانون.
بعد الثوره كل الهيلمان بتاعهم راح مره واحده. و اللي عايز يعمل حاجه بيعملها زي الأول بس المشكله منين؟
المسجلين اللي تم إطلاقهم وقت الثوره و اللي كانوا من الاساس مش محبوسين لانهم كانوا شغالين مرشدين للداخليه مبقاش في حد يلمهم عمدا-كما أرجح- أو ضعف من الشرطه.
من الآخر كانت دولة قهر مش دولة قانون والشرطه كانت بلطجه ببدله رسميه.

يبقى الحل منين؟
تفعيل القانون واعادة دور الشرطه كمنفذ للقانون بعدة محاور
1-تطهير الشرطه عن طريق التدوير بمعنى المسئولين الكبار يمشوا و يتحاكم اللي اتورط في ادارة مؤسسه متهمه بتعذيب او قتل. الاصغر المتواطئين يتم تحويلهم لادارات ليست لها احتكاك مباشر بالمواطنين و نبدلهم مع ناس من الادارات دي بعد تدريبهم بشكل جيد علمي حقوقي.
2-تطوير المعامل الجنائيه و فتح باب دراسات الجنائي كدبلومه بكليات طب و صيدله لتخريج كوادر تعمل بالبحث الجنائي لتجنب تعذيب المتهمين و حل الجرائم بشكل علمي مش فلكي-نسبه للفلكه-.
3-فتح الباب لدراسة دبلومه شرطه لخريجي حقوق لتوفير عدد كبير من الظباط تغطي عدد المستقيلين و المقالين و المحاكمين من الظباط السابقين.
4-وضع كاميرات بالاقسام و السجون و تنفيذ رقابه صارمه من جهات قانونيه مستقله لحماية المواطن من الاساءه و الظابط من تجاوزات المسجلين.

الأربعاء، 1 يونيو، 2011

عداله اجتماعيه!!بتجيبوا منين الكلام ده

يا شعبي العزيز المهاود
قرار انتقالي رقم كبير. "يتم رفع الحد الأدنى للرواتب إلى 700 جنيه حته واحده إن شاء الله ما حد حوش. و الله الموفق"

هو مش حكم المحكمه كان 1200 من 3 سنين يعني باسعار دلوقتي يجيي 1500؟
و فين الحد الأقصى للأجور؟
و ايه وعد الزياده ل 1200 خلال 5 سنين هي الفكره في كلمة 1200 ولا قيمتها؟
لو كده عندي حل نعمل عمله جديده نسميها "روضو" و نخلي الحد الأدني للرواتب 1200 روضو اللي هما بيساوا 300 جنيه سابقا. و نخلي الناس تهيص.

واضح اني مش حافظ ولا فاهم هي يعني ايه عدالة إجتماعيه يعني نرفع الرواتب الصغيره و منفتحش للرواتب الكبيره على البحري و كمان نزود الضرايب مع زيادة الدخل ولا معناها إن روبين هوود يشوف شغله و يسرق من الغني للفقير؟

هي الحكومه دي إسمها حكومة إيه؟ تسيير الأعمال ولا تبخير الأهداف؟ لو حد فاهم يرد بكومنت يفهمني يقعدله في صحته و عافيته قادر يا كريم.

قال كرامه قال

قالك لقد تخلى مبارك عن منصبه كرئيس و كلف المجلس العسكري بإدارة شئون البلاد ........قلنا هيييييه
-هو إحنا فقريين ولا إيه؟ عرابي قال لن نستعبد بعد اليوم اتسكينا إحتلال إنجليزي 72 سنه-
قبل الثوره كان النشطاء بيعتقلوا و يتعذبوا لإرهابهم و أخذ إعترافات منهم و الناشطات كان بيتم التحرش بيهم و إسألوا سلالم نقابة الصحفيين.
بعد التنحي النشطاء بيتعذبوا للإهانه فقط و الناشطات بيتعرضوا لمرحله متقدمه أكثر من التحرش وهي كشف العذريه.
شعار المرحله الإهانه للجميع ايوه علشان نبطل هتاف كرامه حريه عدالة إجتماعيه .

أثناء الثوره طلعلنا طلعت الممثل يفول شباب و بنات و مخدرات و علاقات جنسيه كامله. بعد التنحي طلع لواء يقول شباب و بنات و مخدرات و مولوتوف و علاقات جنسيه كامله. برضه بس جديده المولوتوف دي بصراحه.
و قبضوا على الشباب و البنات في التحرير بتهم البلطجه. طيب و فين محاكمات الفعل الفاضح لو كان فيه علاقات جنسيه؟؟
لو مافيش دليل يبقى قذف ولا انا غلطان؟
طيب هي ليه محاكمات عسكريه للمدنين؟ مفيش محاكم مدنيه؟ ولا علشان السرعه؟
ازاي واحد يسرق هايبر ماركت يتحاكم عسكري و واحد سرق بلد يتحاكم مدني؟
نجاح الثوره مش التنحي لكن تحقيق مطالب الثوره كرامه حريه عداله اجتماعيه

كرامه بتتهان بالضرب من الشرطه العسكريه و هتك عرض الناشطات وقذفهم

حريه غير حقيقيه و حقوقهم الدستوريه بتنتهك بشكل فاضح من المحاكمات العسكريه

عداله إجتماعيه بيقولك عليها مطالب فئويه.
كسرنا سجن الخوف بس بيحاوطونا بسجن مربع كل حدوده حمراء

الجيش خط أحمر
الوحده الوطنيه خط أحمر
ربنا يستر من الخطوط التانيه.

الأحد، 29 مايو، 2011

العين السحريه و الميكروسكوب

العين السحريه بتاعة باب البيت بتشوف منها معظم اللي حوالين الباب من كل الاتجاهات بس مبنشوفش صوره واضحه. بتبقى مقعره شويتين بس وؤيه واسعه والسلام.
الميكروسكوب عدسته بتكشف أدق التفاصيل في مكان محدود جدا بس بتشوف كل التفاصيل الدقيقه. بس أهي رؤيه ضقيقه والسلام.
بص بعينك حواليك حتشوف رؤيه واضحه مش واسعه جدا و مش دقيقه جدا بس تقدر تمشي بيها. بص في الميكروسكوب اما تحتاج تفحص حاجه و بص من العين السحريه لما تحب تشوف اللي حواليك. بس كده

السبت، 28 مايو، 2011

سباق أم مباراه

أنا ماكنتش بحب ألعب كوره وأنا صغير (مبعرفش ألعب بس مجرد تبرير العنب الحصرم يعني). بس كنت بألعب بالعجله علطول. 
المهم لعبة الكوره جماعيه و جميله بس الفريقين بيكونوا كسبان و خسران التعادل معناه ان المباره محسمتش المنافسه و اما تتأجل لمباراة تانيه أو يتحدد الفايز بركلات ترجيح.
أما السباقات و خصوصا العجل الدراجين بيسوقوا العجل في شكل تكتل و بيبدلوا اللي في الصفوف الاولى كل شويه هما بيقولوا علشان اللي في الاول بيكون مقاومه الهوا معاه اكتر (مش مقتنع بصراحه) بس بيشدوا في الآخر و كل واحد يشوف مصلحته.
المهم تاني انه بيكون فيه اول و تاني و ........ واخير بس الأول مغلبش الأخير هو بس حقق وقت أحسن منه.

تنافسنا في الدنيا و الآخره المفروض انه يكون سباق بس احنا بنحوله مباراه.
المباراه دايما بتحتاج خصم أو عدو حتى.
المباراه اما أكسبها و نفسي تكبر و اهيص أو أخسرها و أتقهر وممكن أنفسن كمان لو الحكم غلط أو اللعب مكانش نضيف.
و اكبر دليل على ده اني أهه منفسن و مبحبش الكوره لإني و أنا صغير ماكنتش بعرف ألعب كوره. :=)

الأربعاء، 25 مايو، 2011

المـجــلـس الـمـدنـي ليس هو الحل

ملاحظه من الأول. أنا مش في مصر علشان كده بس مش حنزل يوم 27 مايو.
الثوره نجحت و مبارك إتخلع "لقد تخلى السيد/محمد حسني مبارك عن منصبه كرئيس للجمهوريه" هيييييه.
طبعا كنت فرحان بس فرحتي متمتش لما جيبت للعامل الهندي معايا بيبسي بالمناسبه دي.
مش لإني بخيل طبعا بس لإني قعدت أفهمه 10 دقايق ان مبارك اتشال في ثوره مش سقط في الانتخابات زي ماكان فاكر. 10 دقايق اشرحله يعني ايه ديكتاتوريه جهل سياسي بأه نقول إيه.
بعديها شفيق اتخلع بعد حواره مع الأسواني وبلال ومليونيه اكبر من بتاعة المخلوع الأولاني.
امن الدوله أْعلن حله أخيرا اقتحمت مقاره وبدأت أمن الدوله ليكس.
و جاء الإستفتاء على"نعم" لللإستقرار و لا لطول حكم العسكر. أو "لا" لحكم المجلس و نعم لمجلس مدني.
الناس إختارت نـــعـــــــــــــــــــــــــــم. ماشي براحتكم.
المهم من 11 فبراير لغاية دلوقتي كل مظاهره و اعتصام بيتفض بالقوه المفرطه و البلطجيه و اعتقال المتظاهرين و تعذيبهم و إهانتهم.
ايام المخلوع كانوا بيعتقلوا و يتعذبوا علشان يعترفوا. دلوقتي بيعذبوا لييييه؟؟
كل واحد بيتحاكم بعد مليونيه كل مدير فاسد من أيام المخلوع لسه في مكانه. آه مبارك اتخلع بس الفساد لسه.
الفساد ماكانش تعبان قطعنا راسه. كان زي جلطه كبيره في وريد اما بتاخد دواء ليها بتقل بس مبتدوبش خالص و لو سيبتها ممكن تسد شريان في مكان أخطر. يا تكمل العلاج للآخر يا أما تكون بتقتل المريض.
الفساد لسه موجود زي ماهو بل بالعكس بيتحرك في جو الحريه المتاح دلوقتي و يقدر يحشد ناس أكتر.
دلوقتي لازم العلاج يكمل للآخر و الثوره لازم تكمل. طبعا الواضح ان السلطه الحاليه مش بتتحرك غير بالضغط القوي اما لإنها عقليه إتعودت على الجمود اللي كنا فيه أو لمصالح خاصه.
أتكلم عن العنوان الضغط لازم يستمر لكن مجلس رئاسي لأ لسببين
1- ان ده ضد إختيار أغلبية الشعب.
2- لإن مفيش إجماع على حد.
آه ده حل طويل الأجل بس مع الوقت الشعب حيميل للإصلاح لما يحس بجدوى الموضوع و وقت ما يوصل الضغط لمواجهة صريحه- اتمنى ألا نصل لهذا الحد- حيكون الفساد الباقي أضعف من إنه يقاوم.
انا مع النزول يوم 27مايو لكن ضد مطلب مجلس رئاسي بالرغم إني كنت مؤيد ليه من قبل الإستفتاء لكن فات وقت الكلام عنه.
إن شاء الله اللي ينزلوا موفقين و اللي منزلش يعرف الصح فين.

الاثنين، 23 مايو، 2011

المجلس الأعلى و القوات المسلحه

المجلس العسكري مش هو القوات المسلحه. هو القياده المعينه من قبل القائد الأعلى اللي هو المخلوع.
ولاء المجلس للقائد ولاء القوات المسلحه للشعب.
في أول يوم لنزول الجيش المجلس ورطه في أول غلطه وهي دعم الشرطه بالذخائر لمواجهة المتظاهرين.
يوم موقعة الجمل لم يسمح للقوات بإستخدام القوه لحماية المتظاهرين بالرغم من ان ده إساءه كبيره للجيش إن المتظاهرين اللي في حمايته يتضربوا لمده 14 ساعه تقريبا.
وأخيرا المجلس العسكري أخد القرار الصحيح بالضغط على مبارك للتنحي حمايه للقوات المسلحه من الإنشقاق.

بعد التنحي قامت الشرطه العسكريه بتفريق التظاهرات و فض الإعتصامات بالقوه مع تعمد إذلال غريب. محاوله لكسر كرامتنا اللي رجعت؟ يمكن. محاكمات عسكريه للمتظاهرين ليه؟؟

المجلس العسكري لسه بيفكر بطريقة المجلس ايام 1952. انه السلطه العليا للبلد. القوات المسلحه هي حامي الوطن و المجلس دوره انه يديرها فقط.
مصر ثارت على النظام القديم مش قامت بعملية اصلاح دستوري فيه ناس اتقتلت و ناس اصيبت بعاهات كل ده مش علشان نغير الدستور الفرعوني بدستور قيصري . لأ دستور جمهوري السلطه للشعب اللي دفع ثمن الثوره و ثمن تأخره في القيام بالثوره.
الثوار مش هما اللي بيهينوا القوات المسلحه و مش هما اللي قارنوا أكير قوات مسلحه بالشرق الأوسط و إفريقيا بقوات أمن خاصه بالقذافي.

الخلاصه المجلس جزء من النظام السابق و كلما استمر بنفس طريقة الأداء دي بيغرق نفسه في بحر الرمال المباركي.
أتمنى أن يأخذ المجلس قرار سليم متأخر كثيرا آخر و ينفذ مطالب الثورة التي دفع الشعب ثمنها بالفعل و سيحسب له هذا أمام الله و ضميرهم و التاريخ.
ان تكون متأخر خيرا من لا شئ